香港樓市由2010年到現在，部分樓宇的價格已升超過一倍（當年中原城市指數是~80點，而2017年已升到~160點）。升幅拋離同期GDP增長（2010年：17.76千億港元 / 2016年：24.89千億港元），而恒生指數由2010–2016年都是平均在~22,000點上落徘徊（2017年第3季狂升到~28,000點）。
箇中原因，是否真的如部分專家所講，香港「地少人多」，樓宇供不應求所至？
從另一個角度睇，香港從1997年開始到現在，土地是否真的少了？開山、填海、重建的土地去了哪裡？人口是否急升了很多？分支家庭情況是否真的那麼嚴重？
金融風暴後香港樓市下跌，當年董建華取消八萬五建屋計劃，及之後孫九招減少賣地和停售居屋等政策去穩定樓價，是否那些年香港真的因「樓多人少」引至樓價下跌？
如果供應量唔係主要令樓價下跌的原因，咁真正令樓價狂升的原因又係乜？
我的個人睇法，同之前某些金管局高層成日講的論據有類同之處。不過啲高官講嘢，大部分人都覺得係吹水，不會在意，只會覺得是狼來了的故事。
我個人認為故事的真正魔怪，其實是「熱錢作怪」！
哦…大陸熱錢之嘛，一早就知啦！係佢哋托起咗個市呀嘛，唔使驚喎，啲熱錢會繼續嚟嘅。
如果你咁唸，就大錯特錯了！
喺，2003年沙士之後，中國政府對香港開放自由行及放寬投資移民政策。之後香港樓價上升，很多人就覺得是大陸投資移民將啲樓價炒高了。其實當年已有報道，大陸投資移民買樓最高峰時，只佔全香港的成交量僅1%，並非只是用隻手指尾就可托起整個樓市。而在2010年香港政府在壓力之下，將房地產於投資移民計劃資產類別中剔除，但樓價並沒有因此下跌，反而繼續上升。反映投資移民政策，並不是令樓價上升的主要原因。
但...現時仍然見到很多大陸資金，嚟香港買樓買地喎，罪魁禍首唔係佢哋，仲有邊個？！
其實真正罪魁禍首的熱錢是來自...美國！點解？
但美國班銀行家唔願承擔二按風險，所以美國政府就派出好似香港「證券按揭證券公司」的「房利美」及「房地美」等國營貸款機構，接收那些二次按揭。
正如香港一樣，二按的利息會較一按為高，所以亦吸引到一班華爾街大鱷（如雷曼兄弟等）沾手其中撈油水。但整個美國的次按市場賭注實在太大，雷曼兩兄弟唯有搵高佬盛等疊碼仔，將啲注碼分散到全世界去減低風險。當時好多香港銀行家，發覺搞美國次按市場的利潤高，冇監管，責任少，於是紛紛推銷美國次按投資產品，連啲阿公阿婆都唔放過。最終美國次按爆煲，引發2008年金融海嘯，啲阿公阿婆連棺材本都輸埋。
「量化寬鬆」係乜，咪即係印錢紙囉。全世界的貨幣，其實就如賭枱上的籌碼，大家信呢個籌碼係幾多錢，就值幾多錢。但信時信，傳統玩法需要每個發鈔國家都要有一定的黃金儲備「金本位」。如果唔係，就同篤手指冇乜分別。
但美國因為在全世界夠惡，可以唔照規矩做，錢照印，黃金唔使加，「係咪唔信我先！」，其他國家冇計，唯有咪信住先囉。
其實當一個國家增加貨幣發行量，按道理這個國家的貨幣必然會貶值。假設某個國家增加一倍的貨幣量，這個國家的貨幣價值就應下跌一半。即之前值10元的東西，今日就要20元才可買到。如果唔係，呢個國家嘅身家咪升咗一倍，可以買多一倍嘅貨品囉！
但事實上真係全世界都信呢個惡爺，印錢紙之餘，仲唔使貶值。美國由2008-2013年實施了三輪「量化寬鬆」政策，第一輪QE1，美國聯儲局已經斥資約8,000億美元救市，當中約2,000億美元協助消費者及中小企業更易獲得信貸，其餘約6,000億美元購入兩房等半官方機構包括按揭抵押證券（MBS）等資產。
但在自己條村搵錢，塘水滾塘魚，賺到都要比伯爺罰錢。最好硬係搵街外錢，伯爺唔理你偷呃拐騙得番嚟，都會讚你叻仔。
於是有部分衰仔就將啲熱錢放到香港市場去，因香港並沒有外匯管制。啲熱錢除了放了在股票市場外，更會投入各行各業內，例如房地產業。
班衰仔投資在房地產業的熱錢，當然唔會好似班大陸走資派咁，在下游杯水車薪，排隊買樓咁低B，而是在上游開閘放水。
美國班大鱷究竟放咗幾多熱錢落香港個煲到，實在難以估計。但過往班海盜起錨的時候，通常會用一些估佢唔到的藉口（例如1997年的泰國金融危機），而唔會用一些大家估到的常理原因（例如利率上升、供應量增加等...阿媽係女人的藉口）。仲要推高個股市，等到所有人都以為歌舞昇平，疏於防範的時侯，就殺你一個措手不及。第一浪海嘯通常都係嚇下你，等你以為安全渡過的時候，第二浪海嘯先至要你全軍覆沒。
聽落都幾恐怖，係咪真係會再發生多次「金融地震」？
羊…大部分都喜歡連群走，離群的羊通常會被冷落。要做離群的羊，除了眼光夠遠，看穿山後有草食；還要身手速度夠快，唔係俾啲豺狼食咗都未天光。做領頭嗰隻，就更加要懂得忍受孤獨與堅持。
咁…你想跟80%嗰群，還是20%嗰群？
沒有留言:
張貼留言